当前位置：首页>美女资讯>一代女神「珍妹」嫁女了,「最靚星二代」盡得優良基因

一代女神「珍妹」嫁女了,「最靚星二代」盡得優良基因

2026-03-23 00:25:08

一代女神「珍妹」嫁女了,「最靚星二代」盡得優良基因

【講女系列】

真正嘅女神真係好難超越，就算係自己個女都一樣超越唔到。

就好似之前寫過嘅邱淑貞個女沈月咁，雖然各花各眼，但大部分人都話比唔上阿媽。

咁梗係啦，人哋除咗係女神個女之外，仲係老窦個女吖嘛。

其實只要唔似老窦，似阿媽，就算達唔到阿媽嘅女神級，都已經好靚女㗎喇。

而另一位一代「性感女神」李麗珍珍妹個女許倚榕，情況都有啲類似，就係起碼唔似知名音樂人老窦許願。

日前60歲嘅珍妹就正式升呢做「外母」，因為阿女許倚榕已經應承咗藝人男友張明偉嘅求婚。

話說早兩日許倚榕同張明偉就去咗北海道預支蜜月旅行，當時男方就喺雪地單膝跪地求婚。

而許倚榕就即刻拍片並且po上社交平台，甜蜜寫上「I said YES!」

事後珍妹接受訪問時就親口證實阿女的確答應咗準女婿嘅求婚。

但其實張明偉幾個月前已經「先過外母關」，問準李麗珍同意後先至行動。

所以當阿女打電話畀佢報喜、開心到喊咁話「媽咪，我被求婚呀」嘅時候，佢仲要扮唔知情。

不過珍妹又好感觸咁話：「女大女世界，最緊要佢開心！」同時慨嘆時光飛逝，29歲阿女都要做人妻了。

對於36歲準女婿嘅表現，珍妹就話可以打9分，淨低1分想佢繼續努力，賺錢養老婆。

而珍妹亦都好欣賞張明偉嘅才華同上進心，話佢識作曲、填詞、唱歌，好努力，雖然未一炮而紅但好有心。

唔講唔知，原來阿女呢一段姻緣仲係珍妹一手撮合，佢話有一次喺飯局認識張明偉，覺得佢好仔，所以就介紹畀阿女。

而張明偉嘅家境亦都好唔錯，阿爸係律師，亦曾獲得過太平紳士、榮譽勳章以及銅紫荊星章。

至於張明偉星途就比較一般，雖然讀過TVB藝訓班，亦拍過好多TVB劇集，不過主要都係路人甲。

其中可能最為人所熟知嘅就係《愛·回家》入面嘅「佐治」，不過佢2022年離巢後，就轉型做獨立音樂人。

而星二代嘅許倚榕，細細個父母離婚後，就一直跟住阿媽生活。

因為靚女，所以喺加拿大讀完書返到香港後，都有好幾間娛樂公司、經理人公司想要簽佢。

不過就被佢一一拒絕，因為佢話自己對做藝人、拍戲都冇咩興趣，又怕壓力大。

尤其係覺得自己嘅天份完全唔及阿媽。

雖然唔做藝人，不過佢就選擇咗做KOL，推廣自己嘅時裝品牌，以及分享穿搭同文化產品。

可能有人會覺得佢樣貌或者氣質比唔上珍妹，不過佢都被網民讚過係「最靚星二代」、「翻版陳法拉」。

雖然都係各花各眼，但點講都好，盡得靚媽嘅優良基因，樣貌身材各方面就點都唔會差～

‍‍

‍‍* 原創文章未經許可不得轉載或引用

◂ END ▸

本文来自网友投稿或网络内容，如有侵犯您的权益请联系我们删除，联系邮箱：wyl860211@qq.com 。

最新文章

随机文章