当前位置：首页>美女资讯>TVB「東張·真女神」:人生只拍過1次散拖,如今終於成為幸福人妻!

TVB「東張·真女神」:人生只拍過1次散拖,如今終於成為幸福人妻!

2026-03-24 03:21:55

TVB「東張·真女神」:人生只拍過1次散拖,如今終於成為幸福人妻!

【講女系列】

TVB綜合資訊節目《東張西望》出名多「女神」。

但「女神」呢家嘢，來了又去去了又來，真正可以長久嘅真係冇幾個。

所以佢都可以話係為數唔多嘅「東張·真女神」，由2009年起就已經加入節目組。

佢就係2003年參選港姐入行、第一份工就係TVB、並且一直做到依家嘅吳幸美。

今日41歲嘅佢就突然喺社交平台公佈喜訊，話自己同圈外老公Sammy噚日已經正式結婚。

又大方曬出一堆唯美婚照，甜蜜寫上「相愛、相依、相守、直到白頭」。

著上貼身純白婚紗嘅吳幸美貴氣又優雅，新郎Sammy就簡單淺色西裝加煲呔，靚唔靚仔都係其次，主要係圈外人終於肯現身。

而夜晚婚宴就有唔少圈中好友齊齊到賀，譚玉瑛、李思捷、肥媽、黑妹、李龍基等人都有出席，仲一齊高歌慶賀𠻹。

今日吳幸美喺訪問中就對老公「有讚冇彈」，話只係拍咗一年幾嘅拖，就認定對方係Mr Right。

因為對方有8個字嘅優點「善良老實、三觀一致」，所以希望同對方廝守終身。

其實佢哋嘅戀情嚿年就被周刊影到，當時兩個人喺將軍澳十指緊扣拍拖，仲喺家品店雙雙變成「接吻魚」——

兩個鐘頭內足足咀咗20幾次，愛得熱烈又痴纏。

而入行23年嚟，吳幸美嘅感情甚至唔可以用低調嚟形容，因為佢之前自爆過，人生只係拍過一次散拖。

咁散拖又好難話係正正經經拍拖嘅，所以呢一次都可以話係吳幸美第一次真正拍拖，然後就即刻結婚㗎喇。

作為2003年香港小姐最後12強嘅吳幸美，當年落選之後就被TVB睇中簽約做藝人。

之後拍過唔少劇集，甚至喺《皆大歡喜（時裝版）》就已經分身飾演超過20幾個角色。

其他參與過嘅劇集亦都有過百部，不過大部分都係做路人甲乙丙丁。

直到2009年加入《東張西望》後先至開始多人認識。

之後佢就瞓身工作搏到盡，曾經喺採訪中親自試過「斷片酒」「睡眠水」等等，吸引唔少觀眾收睇。

因為工作認真又親民作風，所以其後就被網民封為「東張女神」。

至於婚後仲會唔會繼續主持節目，吳幸美就話「未來將以全新人妻身份主持《東張》」，仲話會更加努力𠻹。

恭喜，祝福。

‍‍* 原創文章未經許可不得轉載或引用

◂ END ▸

本文来自网友投稿或网络内容，如有侵犯您的权益请联系我们删除，联系邮箱：wyl860211@qq.com 。

最新文章

随机文章