由TVB與優酷聯合出品嘅全新律政劇《正義女神》，將於3月30日起，逢周一至周五晚八點半翡翠台首播。

劇集由鍾澍佳、關旭總監製，佘詩曼、譚耀文、陳煒、周嘉洛、許紹雄、馬貫東、蔣祖曼及戴祖儀等主演，特別演出有文頌嫻。

劇集喺內地熱播中，為咗迎接香港首播，官方尋晚（23日）推出全新宣傳片，搵嚟女主角佘詩曼領軍8位新生代演員，包括近日憑劇中表現人氣急升嘅劉倬昕，仲有陳若思、丘梓謙（蔥頭）、馮皓揚、樂珈嘉、施焯日、蔡景行及羅皓誼一齊拍攝。

宣傳片一開始係一班少年犯嘅誓詞：「本人所作之證供，均屬真實，及為事實之全部，並無虛言。

」之後身穿灰色長西裝褸嘅阿佘迷惘咁走進少年犯堆，帶住疑惑嘅眼神望向各人，期間仲面帶憂傷、眼泛淚光。

之後8位少年犯輪流作出既憤怒又冤屈嘅控訴：「點解你哋要逼我呀」、「點解一直都唔信我呀」、「我係無辜架」、「唔係我哋做架」、「幫我呀」、「收聲呀」…被少年犯嘅冤氣重重包圍嘅阿佘，最終神情痛苦咁閉眼抬頭，成個段落展現出強大嘅闇黑同無力感。

之後鏡頭一轉，換上法官裝束嘅阿佘，鐵面無私又溫柔咁搭過樂珈嘉嘅膊頭後，就獨自一人步向一個廢墟，邁步踏上眼前嘅梯級。

喺梯級盡頭等候阿佘嘅，正係佢劇中同現實生活中都亦師亦友嘅許紹雄。

喺AI特效幫助下，阿佘同許紹雄師徒二人以一個會心微笑嘅表情對望後，原本嘅廢墟即時回復舊有壯麗面貌，重現希望之光，意味住二人在劇中會同心協力，協助一班少年犯走出黑暗、重見曙光。

喺呢條時長分半鐘嘅宣傳片入面，除咗阿佘嘅好演技同埋同許紹雄嘅暖心對望微笑係焦點之外，面對四屆視后阿佘仍然毫不怯場、施展渾身解數展現演技潛能嘅8位新生代演員，亦相當值得關注。

喺片段開頭不斷向阿佘發放負能量嘅8人，不約而同向阿佘做出「一時無辜一時奸險」嘅表情，配以張力十足嘅「黑白閃燈」效果，極具懸疑同心寒感，令觀眾更難以預估8位新生代演員喺劇中嘅「忠奸指數」。

8位新生代演員之中，最吸睛嘅除咗有展現劇中招牌奸笑嘅劉倬昕，仲有哭得無助又靚嘅樂珈嘉，感覺極度我見猶憐，同佢喺《巨塔之后》入面嘅叛逆𡃁妹角色有著極大對比，值得期待。