【講女系列】因為主持TVB節目《東張西望》而被封為「東張女神」嘅鄧凱文，自從早前加入咗新節目《魔音女團》之後，人氣更加有增無減。

最近佢就去咗韓國釜山旅行，仲特意揀咗間有海景嘅酒店房，影番一輯靚相派福利。

化咗個韓式妝，眼睛水汪汪，著住件米白色吊帶小背心加長裙嘅佢，真係愈嚟愈有吸引力。

難怪唔少網民睇到之後都係咁派心話佢靚話佢正，又係咁讚佢S線條特別突出。

由於近年TVB積極改革，除咗改埋公司名之外，亦推出唔少新節目，其中就包括呢個《魔音女團》。

作為今年嘅真人騷節目，公司內部以淘汰制嘅方式挑選旗下一眾小花作為練習生。

目前已經選定16人，鄧凱文就係其中之一，並且目前人氣仲頗高，然後佢哋會接受地獄式特訓，再分階段淘汰。

最後TVB會包裝最後幾位獲勝者以女團身份出道。

不過特訓對於一班唔係歌手出身嘅小花嚟講，並唔輕鬆，又練唱歌又練跳舞，所以鄧凱文都整傷咗腳趾公要包紮住。

其實愈嚟愈少開拍自家製劇集嘅TVB，面對住芸芸小花、僧多粥少，又的確係要開更多又慳錢又有噱頭嘅節目嘅。

就好似嚿年一個低成本「刀仔鋸大樹」嘅《女神配對計劃》咁，就成功跑出兩對CP、多位小花，嚟緊仲會開拍第二季。

所以點辛苦都好，又點會唔引起小花趨之若鶩呢，事業面前，練到受傷都係等閒事。

至於今年26歲嘅鄧凱文，2023年參加過香港小姐競選，最終十強止步。

雖然無緣三甲，但就憑住甜美樣貌同美好身材而被TVB睇中簽約。

入行之後先係做《東張西望》嘅外景主持，人氣同經驗積累唔少之後就升呢做廠景主播。

除咗做主持之外，佢亦試過客串劇集，例如之前喺《新聞女王2》有單元角色，以及早前喺《愛·回家之開心速遞》飾演護士。

雖然鄧凱文成日喺社交平台派福利時都係「男友視角」，不過佢就話自己一直單身冇拖拍。

有冇拖拍就真係唔知，不過咁好身材，而且經常都係因為身材被搶鏡，多人追就肯定㗎喇。

但佢之前就自爆鍾意嘅偶像係視帝黃宗澤，心目中想要嘅就係呢種溫柔、細心、成熟、EQ高又幽默風趣嘅類型。

又要外型黃宗澤，又要性格黃宗澤，咁就真係有啲難喎，除非追佢嗰個真係黃宗澤啦～‍‍‍‍* 原創文章未經許可不得轉載或引用◂ END ▸