【講女系列】作為知名「Double May」，大馬女神林明禎任何一舉一動，都有可能刺激到網民某條神經。

就好似近日，佢喺社交平台分享咗自己著住一件超短超緊身T恤，跑向鏡頭嘅短片，睇到網民心情一齊震盪。

樂於派福利嘅佢，仲「順便」貼多幾張靚相，有車內吊帶，亦有泳池邊嘅若隱若現。

零贅肉好身材加上甜美笑容，真係絕殺，搞到網民即刻留言派心兼大讚：「女神好可愛」、「身材絕了」、「一邊跑一邊震」等等。

之所以對網民咁好，係因為林明禎話自己有份參演嘅兩部電影即將煞科，所以佢「很滿足 非常滿足！

」咁對於網民嚟講，睇到佢呢啲福利，何嘗又唔係一種滿足呢。

今年35歲嘅林明禎，出生喺大馬嘅檳城，排行第二，有個家姐以及兩個細佬，其中家姐林詩枝亦係大馬藝人。

佢9歲嗰年父母離異，之後同阿媽、家姐一齊照顧兩個細佬，由於生活唔容易，所以細個嘅佢基本上係「姊代母職」。

原本夢想只係想做廚師嘅林明禎，2014年喺家姐嘅建議之下開始玩社交平台，點知一po相上網就即刻爆紅。

然後被大馬創作女歌手宇珩發掘、簽約，喺2015年移居台北後正式出道。

林明禎真正喺香港紅起嚟係因為2016年拍過一個香港品牌廣告，因為樣靚身材正，即刻就吸引大家嘅關注。

之後2017年開始接拍港產片，第一部係《救殭清道夫》，飾演女殭屍，雖然之前冇乜演戲經驗。

但因為試鏡時扮殭屍跳嚟跳去，又竟然咁樣被導演睇中——莫非導演睇到佢跳吓跳吓，都感到心頭一震？

而比較令觀眾印象深刻嘅，就係佢喺電影《飯戲攻心》入邊，飾演黃子華女友「阿Meow」。

角色又可愛又討喜，加上港版嘅台詞中，張繼聰係咁話佢係「Double May」，令佢形象更加深入網民心。

事業重心慢慢轉到香港嘅佢，呢幾年廣告接到停唔到手，有傳一年超過30個，所以亦被稱為「廣告女王」。

身材好係林明禎最大嘅標誌，所以佢自己都話，基本上每日最少運動兩個鐘，加上鍾意跳舞同烹飪，生活都幾健康同自律。

嚴格嚟講，佢其實冇刻意行性感路線，奈何魔鬼身材，有時真係無意見一舉手一投足，就會帶嚟唔少話題。

至於感情方面，林明禎都算係比較低調，之前自爆過拍過3次拖，最長一次係8年。

而呢兩年嘅佢嘅緋聞，就係同29歲嘅男團Mirror成員Edan呂爵安傳出戀情。

二人多次被影到一齊食飯、行台灣夜市、飛歐洲旅行，Edan就曾經默認過係追求，希望大家畀啲空間。

但係林明禎就一直強調大家只係朋友關係，一切都要順其自然咁話。

而且佢又強調自己唔急，事業先係重點，就算親戚過年時候催婚，佢都係笑住回覆事業最好、錢要最多。

雖然Edan應該唔係做兵，但想要追到大馬女神，似乎真係唔係咁容易。

當然有時食咗好嘢，又唔一定要曬出嚟嘅，加上兩個人都係事業拼搏期，地下情好啲嘅，起碼留啲幻想畀網民吖嘛。

‍‍‍‍* 原創文章未經許可不得轉載或引用◂ END ▸