【講女系列】曾經被稱為「TVB童顏女神」嘅孫慧雪，日前就喺社交平台分享咗一條收樓短片。

片中佢同老公去咗中山坦洲收樓，然後又帶大家睇吓主人套房、闊落大廳、兩個露台等等。

佢話自己買嘅呢間大屋4房2廳，總價唔使200萬，首期只要15萬，搞到連佢老公都笑佢買樓好似買菜咁。

佢就強調：「因為真係好抵呀！

」之所以去中山買樓，孫慧雪就解釋係因為之前去朋友中山間屋一次，就打算自己都買番間。

喺朋友介紹經紀之後，睇咗幾個盤，一日就落訂，之後佢仲索性買埋車位𠻹。

另外佢又話，近幾年自己工作都好勤力，所以層樓係送畀自己嘅生日禮物，依家收樓，等埋裝修，七月生日時就可以入伙。

正所謂辛苦搵嚟自在食，賺到錢梗係要獎勵吓自己，而且香港搵中山使，更加見使，如佢所言——真係好抵。

而唔少粉絲都留言話「好抵，方便來回香港」，仲有人提到黎耀祥等藝人同樣喺中山買樓，話香港藝人喺大灣區置業係趨勢𠻹。

講開「童顏女神」孫慧雪，其實童顏後面，仲有兩隻字嘅，因為除咗童顏之外，身材一直都係佢嘅最大賣點。

無論係結婚之前，定係生咗兩個仔之後，身材都依然係fit到漏。

而童顏樣貌、皮膚狀態、五官比例，就更加睇唔出佢今年已經43歲，甚至之前佢校服cos，仲被網民讚佢似足大學生、女神依舊索爆等等。

孫慧雪係2006年入行，最開始係投考TVB第20期藝員訓練班，然後同年喺節目《美女廚房》做「粥粉麵飯」四位美女助手嘅「飯」。

而且呢個亦係佢嘅高光時刻，之後好多年佢都只係飾演一啲可有可無嘅小角色，例如飾演宮女、助理、店員，甚至死屍之類。

佢話試過企足10幾個鐘拍戲，辛苦到子宮都有問題，不過佢就一直堅持不放棄。

2016年入行10周年之際，當時34歲嘅孫慧雪就突然推出咗第一本寫真集《Once》，因為身材火辣、曲線美好而被網民瘋傳，仲被封為「宅男女神」。

不過成為網民嘅女神都未有半年，同年佢就同拍咗6年拖嘅富二代男友羅天彥拉埋天窗，婚後生咗兩個仔，一家四口一直好低調幸福。

婚後佢仲再次推出過兩本寫真集，內容方面，當然都係咁辣啦，而佢老公亦都完全冇say no。

雖然樣靚身材正，不過孫慧雪入行20年嚟嘅緋聞並無算唔算多，結咗婚之後就更加零緋聞。

2023年佢約滿之後離巢TVB，轉型做KOL，同時亦為隔篱Viu TV主持節目《美麗40路》以及其他節目，人氣不減反升。

當然啦，生咗兩個仔都冇走樣嘅佢，性感指數亦都係有增冇減～‍‍‍‍* 原創文章未經許可不得轉載或引用◂ END ▸