【講女系列】憑住《喜愛夜蒲1-2》成功彈起，成為好多網民心中女神嘅連詩雅，雖然已經升呢做人妻人母，月底就嚟38歲，但依然樣靚身材正。

趁住生日前夕，最近佢又喺社交平台大派福利，長腿加香肩，即刻引起網民「暴動」。

話說相入面連詩雅著上一套粉紅吊帶連身短裙，心口有個巨型蝴蝶結，襯托出白滑香肩之外，逆天長腿亦都非常吸引。

而網民見到即刻瘋狂大讚：「世一靚腳」、「人妻都凍齡到咁？

」、「長腿代表果然名不虛傳」、「真係索到暈受不了」等等。

仲有啲網民表示，每年都等佢呢類福利，雖然已經有個兩歲嘅女，但狀態依然「靚爆鏡」、「好有殺傷力」咁話。

唔經唔覺，原來連詩雅都已經出道咗20年，15歲開始做model嘅佢，2010年簽咗華納唱片做歌手。

因為自細就識得方大同，入咗華納之後佢就順理成章被稱為「方大同師妹」。

2011年佢主演嘅電影《喜愛夜蒲》，除咗令佢一炮而紅，成為唔少人心目中嘅女神之外，仲入圍第31屆金像獎最佳新演員。

同時電影主題曲《I'm still loving you》亦都一度爆紅，嗰個年頭喺YouTube已經有過千萬點擊。

之後佢陸續出咗唔少歌，《到此為止》、《說一句》、《好好過》、《只要和你在一起》等等，都曾經係熱門歌曲。

早年感情方面，當然唔少得轟動一時嘅前度親密相，話說喺2012年有雜誌爆出連詩雅同前度一輯相片，搞到佢要開記者會交代。

喺記者會上佢坦白自己16歲已經同對方拍拖，不過就唔清楚相片來源，亦唔想知道以及唔想追究。

雖然之後緋聞都唔少，不過去到2019年，連詩雅終於搵到自己嘅真命天子。

當時佢同陳家樂受邀拍攝TVB旅遊節目《12個夏天》，兩個人熟悉之後開始有感覺，地下情咗兩年。

之後2022年，陳家樂約佢出海釣墨魚時成功求婚，2023年喺瑰麗酒店搞咗個300萬嘅盛大婚禮，宴請過千親友。

第二年囡囡出世後，佢哋兩公婆都經常會喺社交平台分享家庭點滴，當然都係又溫馨又甜蜜，冇計啦，郎才女貌。

生咗女之後復出嘅連詩雅，早前就喺TVB綜藝節目《夫妻肺片》入面大談夫妻理財同家庭日常。

佢話自己係一個好有儀式感嘅人，鍾意同老公以及囡囡著親子裝，影好多好多相，而陳家樂一般都會投訴「好攰」。

不過陳家樂都有公開讚過老婆，話對方能夠穩定佢嘅情緒，又頂到佢啲臭脾氣。

反正就係好夾咁解啦。

反正陳家樂就係幸福啦，正所謂返工衛詩雅，返歸連詩雅吖嘛～‍‍‍‍* 原創文章未經許可不得轉載或引用◂ END ▸