【講女系列】被稱為「東張女神」嘅31歲落選港姐王嘉慧，早前又多咗個「美腿女神」嘅稱號。

事緣早前TVB年中節目巡禮後，佢喺社交平台分享咗一輯著住黑色低胸高衩裙嘅福利靚相。

相中佢一時優雅坐低單手托腮，一時雙腳交疊大show美腿，雙手仲輕輕一夾營造深邃事業線𠻹。

搞到網民睇完即刻洗版大讚「世界級靚腿」、「對腳不得了」、「這位同學坐姿有點犯規啊」、「美腿女神令人流鼻血」等等。

而最近呢位「美腿女神」又有新動作，就係去參加香港調解仲裁中心嘅專業調解員資歷認證考試。

佢喺IG限時動態po咗張相，話考試結束：「One exam down」，畢竟都係嚴肅嘅事，冇好似平時咁派發福利都正常嘅。

而且話說呢個考試過程都幾嚴格，學員要先完成約40個鐘嘅理論培訓，內容包括《調解條例》同替代訴訟糾紛處理。

即係用調解方式解決問題，減少打官司嘅對立同成本，之後先有筆試，理論部分通過之後，仲有角色扮演嘅培訓，最後認證考試包括兩個模擬個案。

如此深入學習進修，並且全部通考試後先可以成為列席調解員，之後再有資格申請專業會員。

王嘉慧今次應該係筆試階段，pass之後應該就係名副其實嘅角色扮演喇。

雖然喺2021年港姐落選，不過王嘉慧都係最後五強，而佢之前亦係學霸一名，讀完傳統名校聖保羅男女中學之後，就去咗英國倫敦大學讀心理學系。

並且以一級榮譽畢業，仲上咗Dean's honours list（院長嘉許名單）。

之後返港繼續喺香港中文大學讀法律系碩士，課餘時間仲去考咗個健身教練專業資格，依家又去考調解員，真係非常之勤力。

港姐落選之後被TVB睇中簽約嘅王嘉慧，入行以嚟機會一直唔少，除咗主持《東張西望》之外，仲主持過《通靈之王》、《LAW霸女神》。

另外亦都參演過幾套重頭劇，例如《新聞女王》、《逆天奇案2》、《黑色月光》、《刑偵12》等等。

佢上兩個月雖然積極參加TVB女團「魔音女團」嘅選拔，可惜無法入圍16強，不過佢似乎並冇停低，例如今次咁努力進修。

而作為老窦王亞明係「內地傢俬大王」嘅富家千金，王嘉慧亦係團體馬主之一，佢哋匹馬就累積贏到獎金接近600萬。

至於感情方面，31歲嘅王嘉慧一直保持低調，不過原來佢都係圈中嘅長情代表之一。

據佢所講，同圈外從事金融嘅男朋友已經拍拖超過10年，兩個人喺英國讀大學時相識，一齊讀書、一齊返港發展。

雖然貴為富家千金，不過佢早前喺節目分享過，都有人生煩惱，曾經厭食同抑鬱，但就多得男朋友不離不棄陪伴走過。

有個又靚又正又多金嘅女朋友，邊個男人會離棄，會咁唔識諗啊～‍‍‍‍* 原創文章未經許可不得轉載或引用◂ END ▸